Psa 50 | NdeIBE | STEP | Ihubo lika-Asafi USomandla, uNkulunkulu, uJehova, uyakhuluma, ubiza umhlaba kusukela okuphuma khona ilanga kuze kufike endaweni lapho elitshona khona.

Psalms 50

1 USomandla, uNkulunkulu, uJehova, uyakhuluma, ubiza umhlaba kusukela okuphuma khona ilanga kuze kufike endaweni lapho elitshona khona.

2 EseZiyoni, epheleleyo ngobuhle, uNkulunkulu uyakhazimula.

3 UNkulunkulu wethu uyeza, kayikuthula; umlilo uyahangula phambi kwakhe, emaceleni kwakhe kukhukhula isiphepho.

4 Ubiza amazulu ngaphezulu lomhlaba, ukuze ehlulele abantu bakhe:

5 “Qoqani kimi abahlanjululiweyo bami, abenza isivumelwano lami ngemihlatshelo.”

6 Lamazulu atshumayela ukulunga kwakhe; ngokuba uNkulunkulu ngumahluleli ngokwakhe.

7 “Zwanini, bantu bami, ngizakhuluma; yebo Israyeli, ngizafakaza ngimelane lawe;

8 Kangikukhuzi ngemihlatshelo yakho kumbe iminikelo yakho yokutshiswa, ehlezi ikhona phambi kwami.

9 Angisweli inkunzi ephuma esibayeni sakho kumbe izimbuzi zesilugu sakho,

10 ngoba yiphi layiphi inyamazana yeganga ngeyami, lezinkomo ezisemaqaqeni azinkulungwane.

11 Ngazi zonke izinyoni ezisezintabeni, lezidalwa zeganga ngezami.

12 Aluba ngangingolambayo ngangingekulitshela, ngokuba umhlaba ngowami, lakho konke okukuwo.

13 Ngidla inyama yezinkunzi yini kumbe nginatha igazi lezimbuzi na?

14 Yenzani imihlatshelo yokubonga kuNkulunkulu, gcwalisani izifungo zenu koPhezukonke,

15 njalo lize kimi mhla lisekuhluphekeni; ngizalikhulula, lani lizangidumisa.”

16 Kodwa kwababi, uNkulunkulu uthi: “Lilelungelo bani ukukhuluma imithetho yami kumbe liphathe isivumelwano sami ezindebeni zenu na?

17 Liyazizonda iziqondiso zami, lilahlela amazwi ami emuva kwenu.

18 Lithi lingabona isela lihle libambane lalo; lisuka lingenelane lezifebe.

19 Lisebenzisa imilomo yenu ukukhuluma okubi lifundise ulimi lwenu inkohliso.

20 Linyeya umfowenu njalonjalo, limgcone umntakanyoko uqobo.

21 Lizenzile lezizinto ngazithulela; lalikhumbula ukuthi ngifana lani. Kodwa ngizalikhuza ngilibonisa icala lenu obala.

22 Nanzelelani lokhu, lina elikhohlwa uNkulunkulu, funa ngilidabudabule, kungekho ongalilamulela:

23 Lowo owenza iminikelo yokubonga uyangidumisa, njalo uyalungisa indlela ukuze ngimtshengise insindiso kaNkulunkulu.”